هیوا سەعید: مەبەستمانە ڕۆڵی دایەنگەکان لە بواری ڕەخساندنی ژینگەیەکی گونجاو بۆ گەشەی منداڵ بەرزتر بکەینەوە
ڕۆژی شەممە، ٣١ی ٨ی ٢٠١٩، بە ئامادەبوونی بەڕێز هیوا سەعید، بەرپرسی بەشی دایەنگەکان‌و بەڕێزان شێخ فاخر شێخ تەیب بەڕێوەبەری گشتی کۆمپانیای مایا بۆ پەروەردەو فێرکردن، و بەڕێوەبەرانی دایەنگەکانی قەیوان سیتی‌‌و بەرزاییەکانی قەیوان‌و گوندی ئەڵمانی، مەراسیمێکی تایبەت بۆ ڕێزلێنان لە ستافەکانی بەڕێوەبردن‌و دادەکانی ئەو سێ دایەنگەیە بەڕێوەچوو.
لە وتەیەکیدا بۆ ئامادەبووان، بەڕێز هیوا سەعید، سیاسەت‌و بەرنامەی بەشی دایەنگەکانی بەڕێوەبەرایەتی گشتی چاودێری‌‌و گەشەپێدانی کۆمەڵایەتی لە پارێزگای سلێمانی بۆ ئامادەبووان خستەڕوو، جەختی کردەوە لەوەی کە لە ئێستەدا قۆناغی دابینکردنی سەلامەتی‌‌و چاودێری بەباشی لە دایەنگە حکومی و ناحکومییەکان جێ بەجێ دەکرێت‌و هەموو هەوڵ‌و توانای بەڕێوەبەرایەتی گشتی و بەشی دایەنگەکان‌و ستافەکانمان خستووتە گەڕ تا باشتر بتوانین ژینگەیەکی گونجاو بۆ گەشەی منداڵ لە دایەنگەکان بڕەخسێنین، هەروەک دەستخۆشی لە کۆمپانیای مایاو بەڕێوەبەرو ستافی هەرسێ دایەنگە کرد کە توانیویانە بەباشی سیستم‌و ڕێنمایی دایەنگەکان جێ بەجێ بکەن‌و بە پێی هەڵسەنگاندنی بەشی دایەنگەکان ئاستێکی باش پێشکەش بکەن.
|