یەكەی نیشتەجێبوون بۆ فەرمانبەرانی وەزارەتی کار و کاروباری کۆمەڵایەتی لە سنوری پارێزگای سلێمانی دروست دەکرێت و ژمارەیەکیان بێبەرامبەر دەدرێتە کەمئەندامان.
ڕۆژی یەکشەممە ، 19ـی6ـی2022، بەڕێز ، م. ئیسماعیل ڕەشید ، بەڕێوەبەری گشتی چاودێری و گەشەپێدانی کۆمەڵایەتی لە پارێزگای سلێمانی ، بە ئامادەبونی بەڕێزان ، بەختیار عەلی ، لێپرسراوی بەشی ئەندازیاری ، کما جەبار ، لێپرسراوی بەشی وردبینی ، مافناس هیوا ڕەحمان ، ڕاوێژکاری یاسایی، پێشوازی کرد لە بەڕێز ژین عەبدوڵڵا، بەڕێوەبەری جێبەجێکاری کۆمپانیای ئەلفا لاین .
ئامانج لە سەردانی بەڕێزیان هەماهەنگی زیاتر بو بۆ بەرەوپێشچونی زیاتری کارەکانی کۆمپانیا بە مەبەستی دروست کردنی 2 هەزار یەکەی نیشتەجێبوون بۆ کارمەندانی وەزارەتی کارو کاروباری کۆمەڵایەتی لە سنوری پارێزگای سلێمانی ، هەردوولا رێككەوتن لەسەر دروست کردنی لیژنەیەکی هاوبەش تا کارەکانی بە زووی بچێتە بواری جێبەجێکردنەوە.
بەڕێز م .ئیسماعیل ڕەشید لە دیدارەکەدا ئاماژەی بەوەکرد ، دەبێت لەرووی کوالێتییەوە گرنگی زۆر بە دروستکردنی پڕۆژەکە بدرێت و مەرجە و پێویستیشە لایەنی جێبەجێکار بە نرخێکی گونجاو و بە قیستی درێژخایەن یەکەکان دروست بکەن و بە زووی ئامادەکاری بکەن بۆ تەرخانکردنی زەوی و دیاریکردنی شوێنێکی گونجاو بۆ فەرمانبەران و لەو یەکانەش ئەولەویەت بدرێتە کەمئەندامان و ژمارەیەکی بێ بەرامبەر بدرێتە ئەو چینە.
|