به‌ڕێوه‌به‌ری گشتی ڕێكخراوی وچان به‌سه‌رده‌كاته‌وه‌و ده‌ستخۆشی له كاره‌كانیان ده‌كات
به‌مه‌به‌ستی له نزیكه‌وه ئاشنابوون به كارو چالاكییه‌كانیان‌و هه‌ماهه‌نگی زیاتر، به‌ڕێوه‌به‌ری گشتی ڕێكخراوی وچان بۆ قوربانیانی پێشێلكاری مافی مرۆڤی به‌سه‌ركرده‌وه.
ڕۆژی پێنجشه‌ممه، 6ی 4ی 2017، به‌ڕێز م.عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی به هاوڕێیه‌تی هه‌ریه‌كه له به‌ڕێزان سۆران حه‌مه‌سه‌عید، به‌رپرسی به‌شی پلان‌و ئاره‌زوو غه‌فوور، به‌رپرسی به‌شی پارێزگاری خێزان سه‌ردانی ڕێكخراوی وچان بۆ قوربانیانی پێشێلكاری مافی مرۆڤی كردو له‌لایه‌ن به‌ڕێزان د.ئه‌حمه موحه‌ممه‌د ئه‌مین، به‌ڕێوه‌به‌ری ڕێكخراوو م.سه‌ڵاح حه‌سه‌ن، به‌ڕێوه‌به‌ری ته‌ندروستی ده‌روونی له ڕێكخراوه‌كه‌‌و ژماره‌یه‌ك له كارمه‌ندانه‌وه پێشوازیكران.
ئامانجی سه‌ردانه‌كه‌ی به‌ڕێوه‌به‌ری گشتی زانینی كارو پڕۆژه‌و پلانه‌كانی رێكخراوی وچان‌و هه‌ڵسه‌نگاندنی ڕۆڵی ڕێكخراو بوو له بواری پێشكه‌شكردنی چاره‌سه‌ری ده‌روونی به‌‌و كه‌سانه‌ی ڕووبه‌ڕووی زه‌بری ده‌روونی ده‌بنه‌وه، هه‌روه‌ك نرخاندنی ئه‌و كارانه‌ی پێشكه‌شی به‌ڕێوه‌به‌رایه‌تی گشتی‌‌و به‌تایبه‌ت شه‌ڵته‌ری داڵده‌دانی ئافره‌تانی هه‌ڕه‌شه‌لێكراوی ده‌كه‌ن.
له‌و سه‌ردانه‌دا به‌ڕێوه‌به‌ری گشتی كارو پڕۆژه‌كانی ڕێكخراوی وچانی به‌رزنرخاند به تایبه‌ت له بارودۆخێكدا كه‌لێنێكی گه‌وره له بواری چاره‌سه‌ری ده‌روونی‌‌و خزمه‌تگوزاری ده‌روونی هه‌یه، هه‌روه‌ها ئاماژه‌ی به ڕۆڵی ڕێكخراو كرد له خزمه‌تكردنی ئه‌و كه‌سانه‌ی قوربانی توندوتیژی‌‌و پێشێلكارییه‌كانی مافی مرۆڤ‌و زه‌بره ده‌روونییه‌كانن‌و هیوای خواست له ئاینده‌دا ڕێكخراوی وچان‌و سه‌نته‌ری زه‌بری ده‌روونی باشتر له‌م ڕوه‌وه خزمه‌ت بكه‌ن.
هه‌روه‌ك له سه‌ردانه‌كه‌دا باس له چه‌ند كه‌یسێك كرا كه به ده‌ستپێشخه‌ری ڕێكخراوی وچان چاره‌سه‌ری ده‌روونی باشیان پێشكه‌ش كراوه‌و گۆڕانكارییه‌كان له ژیانیاندا مایه‌ی دڵخۆشی ئاماده‌بووان بوو، هه‌روه‌ك هه‌ردوولا جه‌ختیان له هه‌ماهه‌نگی زیاترو كاری پێكه‌وه‌یی باشتر كرد له خزمه‌تی ئه‌و كه‌سانه‌ی قوربانی پێشێلكارییه‌كانی مافی مرۆڤن‌و ڕووبه‌ڕووی زه‌بری ده‌روونی ده‌بنه‌وه.
هه‌ر له به‌شێكی سه‌ردانه‌كه‌دا، به‌ڕێوه‌به‌ری گشتی‌‌و هاوڕێكانی به‌شه جیاجیاكانی ڕێكحراوی به‌سه‌ركرده‌وه‌و ئه‌و شێوازه نوێیانه‌ی بینی كه به‌كارده‌هێنرێن له پرۆسه‌ی چاره‌سه‌ری ده‌روونیدا كه به سودوه‌رگرتن له ئه‌زموونی وڵاتان وه‌ك شێوازێك بۆ چاره‌سه‌ر به‌كارده‌هێنرێن له لایه‌ن پزیشك‌و ستافه‌كانی ڕێكخراوه‌وه.
ڕێكخراوی وچان، ڕێكخراوێكی كوردییه‌و له‌سه‌رده‌ستی چه‌ند شاره‌زایه‌كی بواری چاره‌سه‌ری ده‌روونی به هاوكاری ڕێكخراوی هاتلاندی ئه‌مریكی دروستكراوه‌و له ئێسته‌دا به‌سودوه‌رگرتن له پشتیوانی ڕێكخراوه نێوده‌وڵه‌تییه‌كان بێ به‌رانبه‌ر‌و قازانج نه‌ویستانه له بواری چاره‌سه‌ری ده‌روونیدا خزمه‌ت ده‌كات.