به‌ڕێوه‌به‌ری گشتی ماڵی داڵده‌دانی ژنان به‌سه‌رده‌كاته‌وه‌و له ژیانی داڵده‌دراوان ده‌پرسێته‌وه
ڕۆژی پێنجشه‌ممه، 26ی 3ی 2020، له چوارچێوه‌ی به‌دواداچوون بۆ دامه‌زراوه خزمه‌تگوزارییه كۆمه‌ڵایه‌تییه‌كان‌و چاره‌سه‌ركردنی كێشه‌و گرفته‌كان، به‌ڕێز م.عومه‌ر گوڵپی، به‌ڕێوه‌به‌ری گشتی چاودێری‌‌و گه‌شه‌پێدانی كۆمه‌ڵایه‌تی له پارێزگای سلێمانی ماڵی داڵده‌دانی ژنانی هه‌ڕه‌شه‌لێكراوی سلێمانی به‌سه‌ر كرده‌وه‌و له نزیكه‌وه به‌دواداچوونی بۆ ژیانی سودمه‌ندان كردو گوێی له كێشه‌و گرفته‌كانیان گرت.
له سه‌ردانه‌كه‌یدا، به‌ڕێز به‌ڕێوه‌به‌ری گشتی به‌دواداچوونی بۆ ژیانی ژنانی داڵده‌دراو كردو گوێی له كێشه‌و گرفته‌كانیانه گرت، هه‌روه‌ك به‌دواداچوونی پلانی هه‌مه‌لایه‌نه‌ی ڕێوشوێنه‌كانی خۆپارێزی له په‌تای كوشنده‌ی كۆرۆنای كردو له نزیكه‌وه ئاگاداری كاروباری به‌ڕێوه‌بردنی ڕۆژانه‌ی ماڵه‌كه‌بوو.
له‌و چوارچێوه‌یه‌دا به‌ڕێز به‌ڕێوه‌به‌ری گشتی ژماره‌یه‌ك ڕێنمایی پێشكه‌ش به سودمه‌ندان‌و ستافه‌كان كردو ده‌ستخۆشی لة به‌ڕێوه‌به‌ری ماڵی داڵده‌دان‌و سه‌رجه‌م ستاف‌و كارمه‌ندان كرد كه به‌شێوه‌یه‌كی شایسته ئه‌ركه‌كانیان جێ به‌جێ ده‌كه‌ن‌و كاری ڕۆژانه‌ی ماڵه‌كه به‌ڕێوه ده‌به‌ن.
|